“ఆమె చనిపోయింది… కానీ మెసేజ్ ఇంకా వస్తోంది! 📱👻” part-1

మూసిన గది రహస్యం

గమనిక: ఈ కథ పూర్తిగా కల్పితం. వినోదం కోసం మాత్రమే రాయబడింది. ఇందులో చూపించిన పాత్రలు, సంఘటనలు నిజ జీవితంతో సంబంధం లేవు.

అద్దంలో కనిపించింది…
కానీ వెనక్కి తిరిగి చూసినప్పుడు… ఎవరూ లేరు…
అదే ఆమె చేసిన పెద్ద తప్పు…
ఆ రాత్రి… ఆమె బ్రతికే బయటపడలేదు 😱

    ఒకరోజు రాత్రి వర్షం గట్టిగా కురుస్తోంది. అది సాధారణ వర్షం కాదు, ఆకాశమే పగిలిపోయినట్టుగా కుండపోతగా కురుస్తోంది. దానితోపాటు గాలి కూడా ఎక్కువగానే విస్తోంది. చెట్లు వంగి మళ్లీ నిలబడుతున్నాయి.

అది గ్రీన్‌వుడ్ అపార్ట్‌మెంట్స్. ఆ రాత్రి మొత్తం అక్కడ ఒక భూతబంగ్లాలాగా కనిపిస్తోంది. మంచి వెలుగులతో మెరిసే ఆ భవనం… ఇప్పుడు పూర్తిగా చీకట్లో మునిగిపోయింది. అప్పుడే ఎక్కడో ఎలక్ట్రిక్ వైర్లు చప్పుళ్లు చేస్తూ... కరెంట్ వెళ్ళి పోయింది. లిఫ్ట్ పనిచేయడం ఆగిపోయింది, కారిడార్లలో ఎమర్జెన్సీ లైట్లు కూడా వెలగడం లేదు. అప్పుడప్పుడు మెరుపు వెలుగు పడినప్పుడు ఒక్క క్షణం మాత్రమే  ఆ భవనం గోడలు, కిటికీలు, బాల్కనీలు అన్నీ కనిపిస్తుంది. తర్వాత వెంటనే మళ్లీ చీకటిలో కలిసిపోతున్నాయి. దూరంగా ఎక్కడో ఒక కుక్క గట్టిగా అరుస్తోంది. 

ఆ అపార్ట్‌మెంట్‌లో ఉన్న ప్రతి ఫ్లాట్‌లోనూ ఒక విచిత్రమైన నిశ్శబ్దం. ప్రజలు ఉన్నారు… కానీ ఎవ్వరూ బయటికి రావడం లేదు. కానీ ఆ చీకటిలో ఒక ఫ్లాట్ బాల్కనీలో మాత్రం ఒక నీడ నిలబడి ఉంది.

అది అన్విత. అన్విత తన బాల్కనీలో నిలబడి ఉంది. చల్లని గాలి వాన చినుకులతో కలిసి ఆమె ముఖాన్ని తాకుతోంది. చేతులతో రెయిలింగ్ పట్టుకుని ఎదురుగా ఉన్న ఫ్లాట్ వైపు చూస్తోంది. అది అద్వైత్ ఫ్లాట్. సాధారణంగా అక్కడ లైట్ ఆన్‌లో ఉండేది… TV శబ్దం, నవ్వులు, ఏదో ఒక శబ్దం ఉండేది. కానీ ఈరోజు మాత్రం అక్కడ కూడా గాఢమైన చీకటి మాత్రమే ఉంది. ఒక్కోసారి మెరుపు మెరుస్తే అతని బాల్కనీ, కిటికీలు క్షణం మాత్రం కనిపిస్తున్నాయి. ఆ క్షణాల్లో ఎవరో లోపల కదులుతున్నట్టు అనిపించి, మళ్లీ ఏమీ కనిపించకుండా పోతుంది.

అన్విత కళ్లను తుడుచుకుని మళ్లీ జాగ్రత్తగా చూసింది. “అది నిజంగానే ఎవరోనా? లేక నా భ్రమేనా?” అని ఆమె మనసులో అనుకుంది. అదే సమయానికి ఆమె చేతిలో ఉన్న ఫోన్ ఒక్కసారిగా వైబ్రేట్ అయ్యింది. ఆ శబ్దం ఆ నిశ్శబ్దంలో చాలా గట్టిగా వినిపించినట్టు అనిపించింది.

అన్విత ఒకేసారి ఉలిక్కిపడింది. ఆమె నెమ్మదిగా ఫోన్ స్క్రీన్ వైపు చూసింది. స్క్రీన్ మీద మెరుస్తున్న పేరు చూసి ఆమె ఆశ్చర్యపోయింది. అద్వైత్... ఇంత టైమ్‌లో…?

వర్షం శబ్దం మధ్యలో, ఆమె మెసేజ్ ఓపెన్ చేసింది. నువ్వు ఏమైనా శబ్దం విన్నావా? ఆ ఒక్క లైన్ చూసిన వెంటనే అన్విత గుండె మళ్లీ గట్టిగా కొట్టుకుంది. ఆమె వెంటనే తలెత్తి అతని ఫ్లాట్ వైపు చూసింది. అక్కడ ఇంకా చీకటే ఉంది. ఎలాంటి కదలిక కనిపించలేదు. శబ్దమా…? ఏ శబ్దం…? అని మనసులోనే అనుకుంది. కానీ ఆమె మనసులో ఒక అనుమానం మొదలైంది. ఇప్పటికే వర్షం, మెరుపులు, చీకటి ఇవన్నీ కలిసి ఒక విచిత్రమైన భయం కలిగిస్తున్నాయి.

ఆమె వెంటనే టైప్ చేసింది ఏ శబ్దం? మెసేజ్ పంపిన తర్వాత ఆమె చూపు మళ్లీ ఆ ఫ్లాట్‌పైనే నిలిచిపోయింది. ఇప్పుడు ఆమెకు స్పష్టంగా అనిపించింది. ఆ చీకటిలో ఎవరో కదులుతున్నారు అని. అప్పుడే ఆమెకు అద్వైత్ నుండి మళ్ళీ ఒక మెసేజ్ వచ్చింది. మా ఇంట్లో ఎవరో ఉన్నట్టు అనిపిస్తోంది. ఆమె గుండె వేగంగా కొట్టుకోవడం ప్రారంభమైంది. ఎదురుగా ఉన్న అతని బాల్కనీ వైపు చూసింది. చూసిన వెంటనే లైట్లు ఒక్కసారిగా ఆఫ్ అయ్యాయి.

    అప్పుడే ఒక పెద్ద శబ్దం కూడా వినిపించింది. అన్విత చాలా భయపడిపోయింది. నా బెడ్‌రూమ్ తలుపు మూసుకుపోయింది. అని మెసేజ్ వచ్చింది. అన్విత గుండెలో దడ మొదలైంది. ఇక్కడ నిలబడి చూడటం కంటే అక్కడికి వెళ్లి ఏమి జరిగిందో తెలుసుకోవడం మంచిది అని ఆమె తనలోనే అనుకుంది. అలాగే వెనక్కి తిరిగి, తలుపు తెరిచి బయటకు అడుగు వేసింది.

కారిడార్ మొత్తం చీకటిలో మునిగిపోయింది. ఎమర్జెన్సీ లైట్ కూడా పనిచేయడం లేదు. దూరంగా ఎక్కడో వర్షం నీళ్లు పైప్ నుంచి జారిపడుతున్న శబ్దం, టప్… టప్… టప్… అంటూ ప్రతిధ్వనిస్తోంది. ఆ శబ్దం మధ్యలో ఆమె అడుగుల శబ్దం మాత్రమే వినిపిస్తోంది. ప్రతి అడుగు వేసినప్పుడు ఆ శబ్దం కారిడార్ అంతా వినిపించినట్టు అనిపిస్తోంది. అన్విత నెమ్మదిగా ముందుకు నడిచింది. చేతితో గోడను తడుముకుంటూ, దారి చూసుకుంటోంది. అప్పుడప్పుడు మెరుపు మెరుస్తే, కారిడార్ ఒక్క క్షణం వెలుగుతో నిండిపోతుంది. వెంటనే మళ్లీ గాఢ చీకటి.

అదే క్షణాల్లో గోడల మీద వేలాడుతున్న నీడలు విచిత్రంగా కదులుతున్నట్టు కనిపిస్తున్నాయి. ఆమె మనసులో భయం పెరుగుతోంది. కానీ అద్వైత్ గురించి ఆలోచన ఆమెను ముందుకు నడిపిస్తోంది. చివరికి ఆమె అతని ఫ్లాట్ తలుపు దగ్గరికి చేరుకుంది. కొన్ని క్షణాలు  ఆమె అక్కడే నిలబడి ఉంది. లోపల ఏదైనా శబ్దం వినిపిస్తుందేమో అని చెవులు గట్టిగా పెట్టి విన్నది. కానీ అంతా నిశ్శబ్దం అది సాధారణ నిశ్శబ్దం కాదు. ఏదో దాగి ఉన్నట్టుగా అనిపించే భయంకరమైన నిశ్శబ్దం.

ఆమె గొంతు ఎండిపోయింది కానీ కొంచెం ధైర్యం చేసి తలుపు దగ్గరికి ఇంకా దగ్గరగా వెళ్లి వణుకుతున్న తన గొంతుతో పిలిచింది…

"అద్వైత్…!”

ఆ శబ్దం కారిడార్ అంతా వినిపించింది. కానీ  లోపల నుంచి ఎలాంటి సమాధానం రాలేదు. ఐతే ఎలాగో లోపలినుంచి తలుపు లాక్ కాలేదని తెలుసుకుంది, నెమ్మదిగా తలుపు తెరిచింది. ఇంటి లోపల పూర్తిగా చీకటి. ఆమె ఫోన్ టార్చ్ ఆన్ చేసుకొని మెల్లగా లోపలికి వెళ్ళింది. నేల మీద పడిన మట్టి అడుగుల ముద్రలు బెడ్‌రూమ్ వైపుకు వెళ్లినట్టు కనిపించాయి. భయపడుతూనే మెల్లగా లోపలికి నడిచింది. బెడ్‌రూమ్ తలుపు కొద్దిగా తెరిచి ఉంది. చప్పుడు చేస్తూనే నెమ్మదిగా తలుపు తోసింది.

    అద్వైత్ నేలపై కూర్చుని గోడ వైపు చూస్తున్నాడు. అన్విత చాలా భయపడిపోయింది. మెల్లగా “అద్వైత్!” అని పిలిచింది. అతను నెమ్మదిగా ఆమె వైపు తిరిగాడు. 

అన్విత నాకు నువ్వు మెసేజ్ చేశావా?” అని అడిగింది, అతను ఆశ్చర్యంగా చూసాడు. 

"నేనా..! నేను ఏ మెసేజ్ చేయలేదే…” అని అన్నాడు.

  అద్వైత్ నంబర్ నుంచే అన్విత ఫోనుకు మళ్ళీ ఇంకొక కొత్త మెసేజ్ వచ్చింది.

  “నేను ఇప్పుడు నీ ఇంట్లో ఉన్నాను.”

అన్విత చేతిలోని ఫోన్ కింద పడిపోయింది. ఆమె గుండె బలంగా కొట్టుకుంటోంది… శ్వాస కూడా సరిగ్గా పడటం లేదు. ఏమి జరుగుతోంది అనేది ఆమెకు అర్థం కావడం లేదు. కొన్ని క్షణాలు అక్కడే నిలబడి నెమ్మదిగా  చాలా నెమ్మదిగా తన ఇంటి వైపు తిరిగింది. ఆమె అడుగులు భారంగా అనిపిస్తున్నాయి. ఎవరైనా వెనుక నుంచి చూస్తున్నట్టుగా ఒక భయం ఆమెను వెంటాడుతోంది.

ఆ క్షణంలో ఆమె బెడ్‌రూమ్ లోపల ఒక కాంతి మెరుపులా కనిపించింది. అన్విత గుండె ఒక్క క్షణం ఆగినట్టయింది. 

“అది… ఏమిటి…?” 

ఆమె కళ్ళు పెద్దవిగా మారాయి. నెమ్మదిగా బెడ్‌రూమ్ వైపు అడుగు వేసింది. తలుపు దగ్గరికి చేరుకుని లోపలికి చూసింది. అక్కడ అద్దం ముందున్న ప్రతిబింబంలో, తెల్ల చీర కట్టుకుని ఉన్న ఒక ఆవిడ నిలబడి ఉంది. ఆమె ముఖం స్పష్టంగా కనిపించలేదు ఎందుకంటే తన జుట్టు ముందుకు పడిపోయి ముఖాన్ని దాచేసింది. అద్దంలో కనిపిస్తున్న ఆ రూపం మాత్రం కదలడం లేదు. నిశ్శబ్దంగా… అక్కడే నిలబడి ఉంది.

అద్దంలో కనిపిస్తున్న ఆ రూపాన్ని చూసిన క్షణంలో, అన్విత శరీరం మొత్తం గడ్డకట్టినట్టైంది. ఆమె కళ్ళు ఆ ప్రతిబింబంపైనే నిలిచిపోయాయి. అది నిజంగానే ఉందా? లేక నా బ్రమేమైనానా అని మనసులో అనుకుంది. ఆమె నెమ్మదిగా తల తిప్పి వెనక్కి చూసింది. గది ఖాళీగా ఉంది ఎవరూ లేరు. తర్వాత అద్వైత్ ఇంట్లో ఉన్న  అద్దం వైపు చూసింది ఇక్కడ అదే ఆవిడ  నిలబడి ఉంది. ఈసారి… అద్దంలో ఆమె తల పైకి లేచింది. జుట్టు కాస్త పక్కకు జరగడంతో. ఆమె ముఖం కొద్దిగా కనిపించింది. అప్పుడు ఆమె ఎవరన్నది తనకి తెలిసింది. అది చూసిన వెంటనే అన్విత గుండె బలంగా కొట్టుకుంటోంది.

"నువ్వా..."! అని అంది అన్విత.

విచిత్రంగా నవ్వుతూ, అలాగే ఏడుస్తూ ఉంది. అద్దంలో కనిపిస్తున్న ఆమె.

"ప్లీజ్ నన్ను వదిలేయ్...."అని ప్రధేయపడింది అన్విత. కానీ ఆమె మాటలు తనకే వినిపించలేదు.  

అప్పుడు అన్విత మెల్లగా ఒక అడుగు వెనక్కి వేసింది. అప్పుడే అద్దంలో ఉన్న ఆ రూపం నెమ్మదిగా చేతిని పైకి లేపింది. అన్విత కూడా భయంతో వెనక్కి జరగబోతుంది కానీ ఆమె కదలలేకపోయింది. ఏదో కనిపించని శక్తి ఆమెను అక్కడే ఆపేసింది. అద్దంలో ఉన్న ఆవిడ… నెమ్మదిగా ముందుకు కదిలింది కానీ…  ఆమె కాళ్లు నేలపై కదలడం లేదు. అద్దం లోపలే దగ్గర పడుతోంది. ఇంకా దగ్గరగా, ఇంకా దగ్గరగా

అప్పుడే ఒక్కసారిగా... అద్దం గట్టిగా పగిలిపోయింది!. గాజు ముక్కలు చుట్టూ ఎగిరిపోయాయి. అన్విత ఒక్కసారి గట్టిగా అరచింది…

“ఆఆఆఆఆఆ…!!!”

ఆ అరుపు మెల్లగా, మెల్లగా నిశ్శబ్దంలో కలిసిపోయింది. ఆ క్షణంలో గది మొత్తం చీకటితో నిండిపోయింది. మరుసటి రోజు ఉదయం వర్షం ఆగిపోయింది, సూర్యకాంతి మెల్లగా గ్రీన్‌వుడ్ అపార్ట్‌మెంట్స్ మీద పడుతోంది. ప్రజలు బయటకు వచ్చారు. నిన్న రాత్రి జరిగిన విషయాల గురించి మాట్లాడుకుంటున్నారు.

అప్పుడే... ఒక ఫ్లాట్ ముందు జనాలు గుమికూడారు. అది అన్విత ఫ్లాట్. పోలీసులు వచ్చారు. తలుపు తెరిచారు లోపలికి వెళ్లిన వెంటనే అక్కడ ఉన్న వాళ్లు ఒక్కసారిగా ఆగిపోయారు. బెడ్‌రూమ్ లోపల అద్దం పూర్తిగా పగిలిపోయి ఉంది. నేలంతా గాజు ముక్కలు. మధ్యలో అన్విత నిశ్చలంగా పడుంది. ఆమె శరీరంపై ఎక్కడా గాయాలు లేవు కానీ ఆమె ఇక బ్రతికి లేదు. పోలీసులు కేసు నమోదు చేశారు…

“అనుమానాస్పద మరణం…”

అంతే. ఎవరికి ఏమీ అర్థం కాలేదు. అయితే ఆ రాత్రి నిజంగా ఏమి జరిగింది…?

అద్దంలో కనిపించిన ఆ ఆవిడ ఎవరు…?

అన్వితకు వచ్చిన మెసేజ్ ఎవరు పంపించారు…?

👉 ఈ రహస్యాలన్నీ Part-2 లో చూడండి…

Follow చేయండి.

Part-2 త్వరలోనే వస్తుంది.

Part-2 Click Here